Rango raanayi ki ye duniya fareb
Tum pe jitna tha yaqeen nikla fareb
Ye tumhari jeet to hargiz na thi
Jaan kar hamne agar khya fareb
Ab to ham bhi maslahatandesh hain
Ek fareebi ne ye sikhlaya fareb
Anjuman the tum tumhe tanha kiya
Tum ko kis ne de diya aisa fareb
Dil ka sauda wo bhi ek chalaak se
Is tijarat men na kha jana fareb
Aaj phir kyon uski yaad aai hamen
Aaj phir seene me kyon dhadka fareb
Ab hai uski zindagi ranjo alam
Muskura kar khoob deta tha fareb
Berukhi begangi parda haya
Tere har andaaz se tapka fareb
Talkhiyon men bhi rahe hum mutmain
Us nazar men tha bada meetha fareb
Wo mera apna tha mera aks tha
aik arse tak jise samjha fareb
ai suhail uski shararat husn hai
tumne kyon har baat men dekha fareb
__________________________________Suhail Kakorvi
MASLAHAT ANDESH=KOOTNITI,ANJUMAN=SABHA,RNJOALAM=DUKH,BEGANGI=AJNABIPAN,HAYA =LAJJA,TALKHIYAAN=KADWAHATEN =MUTMAIN,AKS=CHAYA
|
Post a Comment