Aye husne dehr aye gule jannat kahan hai tu
Main dhundhta hoon tujhko mohabbat kahan hai tu
Ye sare naam khud hi hijabe nigah hain
darpardae majazo haqeeqat kahan hai tu
Murjha rahe hain zakhm ajab iztiraab hai
Aye darde hijre yaar ki lazzat kahan hai tu
mere kamaale nashsha ko khaufe zawaal hai
Abre bahar sayae Rahmat kahan hai tu
Hansta hoon,mere dil men hai wo,poochta hai waqt
Aye badshahe haqqo sadaqat kahan hai tu
Sao baar jeet kar bhi man raazi hoon jang par
Lekin mere hareef ki taqat kahan hai tu
kal kya hua tha bhool,basad shaan laut aa
jazbon ka husn rooh ki raahat kahan hai tu
Aaya wo mere saamne aur hans ke ye kaha
Aye surate Suhail ki rangat kahan hai tu...
---------------------------------------------------------SUHAIL KAKORVI
DEHR=DUNYA,GUL=PHOOL,HIJAAB=PARDA,MAJAZ=SAANSARIK,HAQEEQAT= AYESHWARIY,IZTIRAAB=BECHAINI
HIJRE YAAR=YAAR SE JUDAI,KAMALE NASHSHA=NASHE KA CHARAM=ZAWAAL=GIRAWAT,ABRE BAHAR=BHAR KA BAADAL=REHMAT =KRIPA,HAQOSADAQAT=SACHAI,HAREEF=PRATDUANDI
|
Post a Comment